Strax í vor stefndi í skort á gistingu víða um land og þá sagðist Sævar Skaptason, framkvæmdastjóri Bændaferða og Hey Iceland, hafa áhyggjur af því að ekki yrði hægt að þjónusta alla þá flugfarþega sem komast til landsins næstu mánuði. Alla vega miðað við framboð á flugi en það er á pari við það sem var sumarið 2019.
Þá flugu 678 þúsund erlendir farþegar frá Keflavíkurflugvelli en sú talning er notuð til að meta fjölda ferðamanna á landinu. Til samanburðar taldi þessi hópur 304 þúsund manns yfir sumarmánuðina þrjá í fyrra.
Til viðbótar við skort á gistingu við hringveginn þá er verð á bílaleigubílum mjög hátt en um sextíu prósent ferðamanna hér á landi ferðast um á bílaleigubíl samkvæmt könnunum Ferðamálastofu. Það hafa því verið merki um að bakslag gæti komið í bókanir á Íslandsflugi að undanförnu og nú sjá stjórnendur Play merki um slíkt.
Í kynningu með fjárfestum í morgun sagði Birgir Jónsson, forstjóri Play, að bókanir á flugi erlendra ferðamanna til Íslands í sumar hafi náð hámarki fyrir nokkrum vikum síðan. Forstjórinn áréttaði að pantanir væru ekki á hraðri niðurleið en að hans mati skrifast niðursveiflan á takmarkaða afkastagetu ferðaþjónustunnar í kjölfar heimsfaraldurs. Sagði Birgir því líkur á að útlendingar, áhugasamir um ferðalag um Ísland í sumar, ættu í erfiðleikum með að finna gistingu og bóka afþreyingu.
Forstjóri Play bætti við að við þessar aðstæður væri kostur við viðskiptamódel flugfélagsins að geta fókusað á aðra hópa farþega. Sérstaklega tengifarþega sem eru til í að millilenda hér á Keflavíkurflugvelli á leið milli Evrópu og Norður-Ameríku.