Yfir sumarmánuðina eru Þjóðverjar næstfjölmennastir í hópi ferðamanna hér á landi á eftir Bandaríkjamönnum. Munurinn á þjóðunum tveimur er þó sá að þýskir túristar gefa sér um tvöfalt lengri tíma í Íslandsferðina en þeir bandarísku.
Framboð á áætlunarflugi hingað til Þýskalands hefur líka verið mikið og meðal annars hefur þýska lágfargjaldafélagið Eurowings, dótturfélag Lufthansa, haldið úti ferðum hingað yfir sumarið um langt árabil. Áætlunin í ár gerði ráð fyrir að þotur Eurowings myndu fljúga til Keflavíkurflugvallar frá bæði Hamborg og Dusseldorf. Ekkert varð hins vegar af ferðunum frá þeirri fyrrnefndu í júní og flugleiðin hefur verið tekin af dagskrá í júlí og ágúst.
Talsmaður Eurowings segir í svari til Túrista að Eurowings, líkt og svo mörg önnur flugfélög, hafi þurft að gera breytingar á áætlunum sínum vegna takmarkaðrar afkastagetu. Það sé einfaldlega ástæðan fyrir breytingunni.
Það verður því Icelandair sem situr eitt að Íslandsfluginu frá Hamborg í sumar með fjórum ferðum í viku fram í byrjun október.
Eurowings er ekki eina félagið sem hefur dregið úr framboði á flugi milli Íslands og Þýskalands í sumar. Play hætti strax í vor við áformaðar ferðir til Stuttgart í sumar.
