Það stefnir í að áætlunarferðirnar til og frá Keflavíkurflugvelli verði um fimmtungi fleiri í september og október en þær voru á sama tíma árið 2019.
Þá voru það Bandaríkjamenn sem keyptu langflestar gistingar á íslenskum hótelum og það er viðbúið að að svo verði einnig að þessu sinni. Því samkvæmt upplýsingum frá bókunarrisanum Booking.com eru það einmitt Bandaríkjamenn sem hafa pantað flest herbergi á íslenskum gististöðum í haust.
Þar á eftir koma Þjóðverjar, svo Spánverjar, Ítalir og Bretar.
Athygli vekur að Ítalir eru í fjórða sæti en haustið 2019 voru þeir aðeins í fimmtánda sæti yfir þær erlendu þjóðir sem keyptu flestar gistingar á hótelum hér á landi samkvæmt tölum Hagstofunnar. Bretar voru þá í öðru sæti á eftir Bandaríkjamönnum, svo komu Kínverjar, Þjóðverjar og Frakkar.
Listi Booking.com fyrir komandi haust er því nokkuð frábrugðinn en eins og gera mátti ráð fyrir þá verða kínverskir ferðamenn áfram frekar fáir hér á landi sökum sóttvarnaraðgerða í heimalandinu.
Það ætti heldur ekki að koma á óvart að flestir þeir sem hafa bókað íslenskt hótel á síðu Booking.com fyrir haustið ætla sér að gista í Reykjavík en Reykjanesbær er í öðru sæti. Vík er því þriðja, Höfn í fjórða og svo kemur Akureyri.