Núna fljúga þotur Play daglega til allra þriggja áfangastaða félagsins í Bandaríkjunum en áætlun félagsins fyrir komandi vetur gerði ekki ráð fyrir neinum ferðum vestur um haf á mánudögum og þriðjudögum.
Á því hefur hins vegar verið gerð breyting því nú er hægt að bóka flug með Play til New York, Baltimore og Boston alla daga vikunnar næstu misseri.
Birgir Olgeirsson, upplýsingafulltrúi Play, segir að ákveðið hafi verið að fjölga ferðum til áfangastaða í Evrópu og í Bandaríkjunum næsta vetur og þar með fjölga tengimöguleikunum fyrir þá farþega sem ætla að fljúga með Play alla leið yfir Norður-Atlantshafið.
„Auk þess eru mánudagar og þriðjudagar vinsælir dagar þegar kemur að frakt útflutningi þannig með því að bæta við þessum dögum í nóvember og desember þá erum við að þjóna þeim markaði betur,“ bætir Birgir við.
Í New York hefur Play notast við Stewart flugvöll í stað þess að fljúga til JFK eða Newark flugvallar líkt og keppinautarnir. Spurður hvort það sé til skoðunar hjá Play að færa sig yfir á þessa stóru flugvelli þá segir Birgir að þess háttar flutningur sé ekki í pípunum.
