Flugmiðar hafa selst eins og heitar lummur í sumar en horfurnar fyrir veturinn eru óljósar að margra mati. Það skrifast helst á stríðrekstur Rússa í Úkraínu en útlit fyrir að Evrópubúar þurfi að borga óvenju mikið fyrir að hita upp heimili sín næstu misseri. Fólki er víða ráðlagt að leggja fyrir til að eiga fyrir orkureikningum vetrarins.
Hver áhrif þessa verða á margumtalaðan „ferðavilja“ fólks á eftir að koma í ljós.
Gengi hlutabréfa í norrænum flugfélagum lækkaði þó umtalsvert í vikunni eins og sjá má hér fyrir neðan. Þetta var aðra vikuna í röð sem virði allra flugfélaga fer niður á við en það er þó viðbúið að næstu uppgjör muni sýna fram á töluverðan hagnað af rekstrinum nú í sumar.
Vertíðin hefur nefnilega verið góð og fargjöldin oft óvenju há eins neytendur hafa fundið fyrir og stjórnendur flugfélaga staðfest. Fjárfestar eru þó sennilega að horfa lengra fram í tímann sem skýrir þá lækkanir síðustu vikna.
