Samfélagsmiðlar

Icelandair horfir til rafvæðingar í innanlandsflugi

Tölvuteikning af hinni þrjátíu sæta flugvél sem Icelandair stefnir á að taka í notkun fyrir lok áratugarins.

Icelandair skrifaði nú í viklulokin undir nýja viljayfirlýsingu við Heart Aerospace í tengslum við rafmagnsflugvél sem fyrirtækið vinnur að. Fulltrúar Icelandair verða jafnframt hluti ráðgjafanefndar sem sænski flugvélaframleiðandinn hefur sett á fót. Í ráðgjafanefndinni eru auk Icelandair fulltrúar frá flugfélögum, flugvélaleigum og flugvöllum. Ráðgjafanefndinni er ætlað að tryggja að flugvélin henti þörfum notenda sem best. Þannig er stuðlað að því að orkuskipti flugsamgangna geti hafist sem fyrst að því segir í tilkynningu.

Flugvélin sem Heart Aerospace vinnur nú að er 30 sæta tvinnvél, ES-30 sem stjórnendur Icelandair telja að nýtist vel í innanlandsflug hér á landi. Flugfélagið hafði áður skrifað undir viljayfirlýsingu um 19 sæta rafmagnsflugvél frá Heart Aerospace en þessi nýja mun koma í stað hennar.

„ES-30 er 30 sæta farþegavél búin hljóðlátum rafmagnshreyflum sem geta einnig gengið fyrir sjálfbæru flugvélaeldsneyti. Á skemmri flugleiðum gæti vélin gengið eingöngu fyrir rafmagni og þar með gert kolefnislaust innanlandsflug að veruleika. Á lengri flugleiðum gæti vélin gengið fyrir blöndu rafmagns og sjálfbærs flugvélaeldsneytis. Drægni vélarinnar verður um 200 km með 30 farþega á rafmagni eingöngu, 400 km með blöndu af rafmagni og sjálfbæru flugvélaeldsneyti, en allt að 800 km með 25 farþega. Þannig gæti flugvélin nýst á öllum flugleiðum innanlands og dregið umtalsvert úr kolefnislosun. Heart Aerospace gerir ráð fyrir að flugvélin verði komin í notkun árið 2028,“ segir í tilkynningu,

„Markmið okkar er að rafvæða flug á styttri flugleiðum, en það gerum við ekki ein. Það er sameiginlegt verk margra aðila að gera flug kolefnislaust. Með samstarfinu getum við haft áhrif á alla virðiskeðjuna, allt frá því að framleiða umhverfisvænni flugvélar, til þess að gera flugvelli aðgengilegri fyrir umhverfisvænar vélar. Þannig gerum við flug þægilegra, ódýrara og sjálfbærara fyrir almenning,“ skrifar Anders Forslund, stofnandi og forstjóri Heart Aerospace, í tilkynningu.

Þar er haft eftir Heiðu Njólu Guðbrandsdóttur, aðstoðarframkvæmdastjóra rekstrarsviðs Icelandair að það sé sönn ánægja að útvíkka samstarfið við Heart Aerospace.

„Við höfum sett okkur metnaðarfull markmið um að minnka losun í starfsemi okkar og einn þáttur í því er að stuðla að framþróun nýrrar tækni. Vegna stuttra flugleiða og góðs aðgangs að umhverfisvænni orku er Ísland í einstakri stöðu til þess að gera innanlandsflug kolefnislaust. Heart Aerospace stefnir á að fyrsta flugvélin verði komin í notkun á þessum áratug. Það er mjög ánægjulegt fyrir okkur hjá Icelandair að taka þátt í þróuninni og greiða þannig leiðina til orkuskipta í flugi,“ segir Heiða Njóla.

Nýtt efni

„Fyrir þessa aðgerð voru rúmlega 800 manns í störfum sem ekki eru flugtengd og uppsagnirnar náðu eingöngu til þeirra," segir Bogi Nils Bogason, forstjóri Icelandair Group, en fyrirtækið samdi í dag um starfslok 82 starfsmanna. Uppsagnirnar náðu ekki til áhafna líkt og FF7 hafði áður greint frá. „Eins og við höfum sagt þá var árið …

Fjárfestar lögðu Play til 4,6 milljarða króna í hlutafjárútboði félagsins sem lauk þann 11. apríl síðastliðinn. Í kjölfarið urðu töluverðar breytingar á hópi stærstu hluthafa félagsins. Nú er lífeyrissjóðurinn Birta stærsti einstaki hluthafinn en samanlagt fara sjóðir á vegum Íslandssjóða fyrir enn stærri hlut. Meðal nýrra stórra hluthafa er félag í eigu Einars Sveinssonar og …

Icelandair sagði í dag upp 82 starfsmönnum en um er að ræða starfsfólk úr ýmsum deildum á skrifstofum og starfsstöðvum félagsins. Í tilkynningu er bent á að Icelandair hafi á árunum 2021 til 2023 ráðið og þjálfað um 2.500 starfsmenn og góður árangur hafi náðst við að byggja félagið hratt upp eftir heimsfaraldurinn. Nú er …

Ráðuneyti viðskipta og sjávarútvegsmála í Noregi kynnti fyrir tveimur árum drög að frumvarpi um að þarlendir kjarasamningar og reglur um aðbúnað næðu líka til áhafna erlendra skipa sem færu um norska lögsögu. Litið yrði svo á að um leið og erlent skip færi inn fyrir norska lögsögu giltu um það sömu reglur og alla innlenda …

Bláa lónið í Svartsengi hefur rýmt öll sín athafnarsvæði vegna jarðhræringa við Sundhnúkagígaröðina nú í morgun. Rýmingin gekk vel að því segir í tilkynningu og er gestum þakkaður góður skilningur á stöðunni, starfsmönnum fagleg vinnubrögð og viðbragðsaðilum gott samstarf. Bláa lónið er einn allra vinsælasti viðkomustaður ferðamanna hér á landi en vegna jarðhræringa á Reykjanesi …

Icelandair hefur gripið til hópuppsagna í dag og munu þær ná til ólíkra deilda innan fyrirtækisins að því segir í frétt Vísis. Þar er haft eftir Ásdísi Ýr Pétursdóttur, talskonu Icelandair, að dagurinn í dag sé erfiður en hún geti ekki tjáð sig nánar um stöðuna af virðingu við starfsfólkið. Heimildir FF7 herma að uppsagnirnar …

Miklar breytingar eru við sjóndeildarhringinn í grænlenskri ferðaþjónustu. Ný flugstöð verður tekin í notkun í Nuuk 28. nóvember. Síðan er ráðgert að ljúka framkvæmdum við nýjar flugstöðvar í Ilulissat og Qaqortoq á Suður-Grænlandi fyrir lok ársins 2026. Nú sinna Air Greenland og Icelandair Grænlandsflugi en færi ættu að skapast til að laða að fleiri flugfélög. …

Þýski Volkswagen ætlar ekki að játa sig sigraðan í baráttunni um markaðinn fyrir ódýrar gerðir rafbíla, þar sem kínverskir framleiðendur hafa náð góðri fótfestu og boða enn frekari landvinninga. Fyrr í mánuðinum runnu út í sandinn viðræður fornu fjendanna Volkswagen og franska Renault um að standa sameiginlega að þróun og smíði nýs rafknúins alþýðubíls til …