Ráðgjafarfyrirtækið Intellecon kynnti í síðustu viku, fyrir hönd Ferðamálastofu, sína fyrstu formlegu spá um meginstærðir í ferðaþjónustu á næstu árum. Og það er skemmst frá því að segja að þar er gert ráð fyrir metfjölda ferðamanna til landsins á næsta ári eða tæplega 2,4 milljónum ferðamanna.
Það er ögn meira en metárið 2018 þegar héðan flugu rúmlega 2,3 milljónir ferðmanna. Það ár var flugumferðin þó töluvert meiri en gert er ráð fyrir eftir áramót samkvæmt ferðagögnum Túrista.
Framboð á áætlunarflugi í janúar og febrúar næstkomandi er sextán prósent minna en það var á sama tíma fyrir fimm árum síðan. Engu að síður gerir spáin ráð fyrir að þá verði fjöldi ferðamanna á pari við það sem var fyrir fimm árum síðan.
Í mars á næsta ári er svo reiknað með að 183 þúsund erlendir ferðamenn fljúgi frá Keflavíkurflugvelli eða 10 þúsund fleiri en metárið 2018. Á dagskrá flugvallarins eru hins vegar fjögur hundruð færri brottfarir en voru þennan sama mánuð fyrir fimm árum síðan. Samdrátturinn nemur fimmtungi.
Af þeim sökum þarf hver þota sem hér lendir í mars að vera með 28 fleiri erlenda ferðamenn að jafnaði en þoturnar sem komu í mars 2018 ef spá Intellecon á rætast.
Til að auka líkurnar á ferðamennirnir verði svona margir í hverri þotu þá þarf hlutfall tengifarþega hjá Icelandair og Play að haldast í lægri kantinum. Þannig aukast líkurnar á að fleiri laus sæti verði fyrir ferðamenn á leið til Íslands.
Sumaráætlun fluggeirans hefst í lok mars en þessar vikurnar eru flugfélög að leggja lokahönd á dagskrána. Ekki liggur fyrir hversu miklu Icelandair ætlar að bæta við en umsvif félagsins, í flugferðum talið, voru í júlí sl. um 90 prósent af því sem var 2018.
Til að fylla skarð Wow Air þyrfti Play svo að þrefalda flugáætlun sína frá nýliðnu sumri en ljóst er að það gerist ekki. Flugfloti félagsins mun aðeins stækka úr sex þotum í tíu.
Spá Intellecon gerir ráð fyrir áframhaldandi vexti í komum ferðamanna til Íslands og fjöldinn fari uppí 2,8 milljónir ferðamanna á þarnæsta ári. Árið 2025 verði þeir rétt um þrjár milljónir. Hafa ber í huga að þarna er aðeins horft til fjölda þeirra sem fara um Keflavíkurflugvöll.
