Norska lágfargjaldafélagið Flyr hóf áætlunarflug í lok júní í fyrra og óhætt er að segja að afkoman hafi ekki staðið undir væntingum. Félagið hefur því í þrígang þurft að auka hlutafé til að halda starfseminni gangandi enda nemur fjármagnsbruninn um tveimur milljörðum norskra króna frá því í byrjun síðasta árs. Sú upphæð jafngildir um 28 milljörðum íslenskra króna.
Nærri helmingur þeirrar upphæðar er það hlutafé sem fjárfestar hafa lagt í Flyr og það liggur fyrir að félagið þarf meira. Framundan eru því tvö hlutafjárútboð þar sem ætlunin er að ná í 450 milljónir norskra króna eða um 6,4 milljarða íslenskra.
Og það verður ekki Tonje Frislid sem mun leiða þá vinnu því í gær sagði hún upp en Frislid hefur stýrt Flyr frá stofnun og verið eina konan í hópi norrænna flugforstjóra. Eftirmaður hennar er maður að nafni Brede Huser en sá hefur verið fjármálastjóri Flyr. Sá fetar nú í fótspor Boga Nils Bogasonar og Geir Karlsen, forstjóra Icelandair og Norwegian, en þeir voru báðir fjármálastjórar flugfélaganna tveggja áður en þeir settust í forstjórastólinn.
Nýs forstjóra Flyr býður það verkefni að halda félaginu gangandi næstu mánuði en vegna fjárskorts hefur vetraráætlunin verið skorin niður um helming. Þar munar mest um innanlandsflugið í Noregi en samkeppnin á þeim markaði er hörð og hefur Flyr orðið undir. Norwegian, SAS og Widerøe hafa nefnilega ekki gefið neitt eftir og það hefur reynst Flyr erfitt að fóta sig á markaðnum.
Félagið vonast því til að fylla Boeing Max þoturnar sínar af farþegum sem vilja fljúga milli Óslóar og Evrópu og þar með sýna þau batamerki sem þarf til að fjárfestar sjái hag í því að leggja félaginu til meira fé eftir áramót.
Eins og Túristi fjallaði um í gær þá verður hlutafé í Norse og Play líka aukið á næstunni en þessi tvö félög fóru líka í loftið í heimsfaraldrinum líkt og Flyr.
