Þotur þýska flugflugfélagsins Condor munu fljúga vikulega frá Frankfurt í Þýskalandi til bæði Akureyrar og Egilsstaða frá miðjum maí og fram í lok október. Samtals verða sæti fyrir um tíu þúsund farþega í þeim fimmtíu ferðum sem eru í sölu frá Þýskalandi í dag.
Aldrei áður hefur flugfélag, hvorki íslenskt né erlent, haft á boðstólum álíka mikið alþjóðaflug frá Egilsstöðum. Condor brýtur líka blað á Akureyri því erlend flugfélög hafa hingað til aðeins flogið þangað yfir stutt tímabil.
Nú eru þrír mánuðir í fyrstu brottfarirnar og að sögn talskonu Condor þá er unnið náið með ferðamálayfirvöldum á hverjum stað og áhuginn er að aukast.
„Engu að síður verður við að halda áfram að láta ferðalanga vita af þessum nýja flugi okkar til Íslands en við verðum var við eftirspurn frá bæði ferðaskrifstofum og einstaklingum.“
Þörf á fleiri hótelum
Það er skortur á hótelgistingu víða um land á sumrin og á Akureyri hefur ferðaþjónustan kallað eftir nýjum hótelum líkt og Túristi fjallaði um í fyrra. Eins og staðan er í dag er hins vegar ekki útlit fyrir að ný hótel opni í höfuðstað Norðurlands fyrr en í fyrsta lagi árið 2025.
Talskona Condor segist þekkja til þessa ástands á gistimarkaðnum en segist sannfærð um að uppbygging hótela fyrir norðan og austan muni leiða til breytinga á stöðunni á næstu árum.
„Flugferðir Condor munu hafa jákvæð áhrif á framgang ferðaþjónustunnar á þessum svæðum,“ bætir upplýsingafulltrúi þýska flugfélagsins við.
Flugstöðin verður ekki tilbúin
Condor verður eina flugfélagið sem heldur úti reglulegu millilandaflugi frá Egilsstöðum í sumar en frá Akueyri er framboðið meira. Transavia tekur upp þráðinn í beinu flugi þangað frá Hollandi og Edelweiss ætlar að spreyta sig í fyrsta sinn í flugi milli Zurich og Akureyrar. Til viðbótar við þetta þá gerir sumaráætlun Niceair ráð fyrir brottferðum í hverri viku til Kaupmannahafnar, Tenerife, Alicante og Dusseldorf og Transavia Zurich koma þotur Edelweiss.
Það er hins vegar útséð með að ný álma við flugstöðina á Akureyrarflugvelli verði tilbúin fyrir sumarið því framkvæmdum við hana hefur seinkað í um níu mánuði og verðu hún í fyrsta lagi tekin í notkun á næsta ári.
