Nú hefur verkfall Eflingar hjá Íslandshótelunum staðið yfir í viku og dag leggja Eflingarfélagar niður störf á Edition hótelinu við Hörpu og Berjaya Iceland Hotels, áður Icelandairhótelunum.
Þar með nær verkfallið til fimmtán hótela í Reykjavík og fjórtán önnur gætu bæst við í lok mánaðar því nú stendur yfir atkvæðagreiðsla meðal félagsfólks stéttarfélagsins um verkföll á Keahótelunum og Centerhótelunum.
Febrúar er vanalega annasamur tími í ferðaþjónustunni á höfuðborgarsvæðinu og miðað við framboð á flugi til Keflavíkurflugvallar þá má búast við um 150 þúsund erlendum hótelgestum í Reykjavík í febrúar líkt og fram kom í samantekt Túrista.
Og til marks um góða bókunarstöðu þá hafði RÚV það eftir Hildi Ómarsdóttur, aðstoðarframkvæmdastjóra Berjaya Iceland Hotels, að þar væru níu af hverjum tíu herbergjum bókuð þessa dagana. Hótelkeðjan er með rúmlega eitt þúsund herbergi á sínum snærum í Reykjavík og má búast við að þrif á herbergjunum fari úr skorðum í verkfallinu að sögn Hildar.
Samkvæmt því sem Túristi kemst næst er ekki útlit fyrir að loka verði hótelum á höfuðborgarsvæðinu í þessari viku en ástandið gæti orðið erfitt frá og með helginni.
