Áætlað er að tekjur ferðaþjónustunnar 2022 hafi verið 409 milljarðar króna en árið 2019 voru þær 350 milljarðar. Samkvæmt greiningu KPMG störfuðu 2.180 fyrirtæki í greininni á síðasta ári en þau voru 2.120 árið 2019. Þessi seigla fyrirtækjanna skipti sköpun við endurreisnina í fyrra. Fjöldi gistinátta var 8,8 milljónir en þær voru heldur færri 2019 eða 8,4 milljónir. Um 1,7 milljónir ferðamanna komu til landsins á síðasta ári en fyrir faraldurinn, árið 2019, komu 2,0 milljónir.
Ferðaþjónustan tapaði 27 milljörðum króna í heimsfaraldrinum þrátt fyrir mótvægisaðgerðir af hálfu stjórnvalda en náði sér vel á strik arið 2022. Afkoma var góð og fjárhagsstaða greinarinnar því minna áhyggjuefni en áður var talið, sagði Svanbjörn Thoroddsen, sviðsstjóri ráðgjafasviðs KPMG, þegar hann kynnti fjárhagsafkomu ferðaþjónustunnar 2022 í morgun. Hann nefndi þó að stóraukinn vaxtakostnaður gæti orðið erfiður.
„Stóra spurningin er hvort þessi góða afkoma greinarinnar 2022 sé komin til að vera? Er hægt að gera ráð fyrir því að hægt sé að viðhalda svona góðri afkomu til framtíðar? Það er auðvitað ekki svo.“
Svanbjörn benti á að blikur væru á lofti: Miklar vaxta-, verðlags- og launahækkanir. Leigukostnaður, sem hefði verið frestað í faraldrinum, ætti eftir að bíta á þessu ári og þeim næstu. Þá hefði krónan verið tiltölulega veik 2022 en hún væri að styrkjast og það gæti dregið úr samkeppnishæfni. Svo gæti órói í heimspólitíkinni – ekki síst stríð Rússa í Evrópu – haft áhrif á eftirspurn og þróun greinarinnar. Ýmsar áskoranir blöstu líka við vegna uppbyggingar innviða til að mæta með sjálfbærum hætti ætlaðri fjölgun ferðamanna á næstu árum:
„Að við tryggjum að verið sé að vinna innan þolmarka greinarinnar og samfélagsins í þeirri uppbyggingu sem framundan er.“
Niðurstaðan KPMG er þessi með orðum Svanbjörns Thoroddsens:
„Kannski er ekki alveg kominn tími til að halla sér aftur, segja að við séum komin fyrir vind og allt horfi vel inn í framtíðina. Það eru ýmsar áskoranir þó vissulega sé staðan mun bjartari en horfði við þegar við vorum að fara í gegnum faraldurinn. Það er gríðarlega ánægjulegt að sjá hversu viðreisnin gat orðið hröð og góð – vegna þess að fyrirtækin voru til staðar.“
