Samfélagsmiðlar

Meira tap en áður í ársbyrjun

Afkoman hjá Icelandair á fyrsta ársfjórðungi var verri en hún hefur verið um langt árabil ef Covid-árið 2020 er undanskilið. Skýringin liggur meðal annars í mun minni fiskútflutningi.

Sætanýtingin hefur ekki áður verið eins góð hjá Icelandair á fyrsta ársfjórðungi. Félagið nýtir líka í auknum mæli minni þotur en áður var og þurfti að sameina ferðir vegna veðurs.

Fyrsti fjórðungar hvers ár er vanalega í mínus hjá flugfélögum í okkar heimshluta og það var viðbúið að bæði Icelandair og Play yrðu rekin með tapi þessa fyrstu þrjá mánuði ársins. Félögin birtu uppgör sín í lok síðustu viku og niðurstaðan var tap upp á rúma 9 milljarða hjá Icelandair og þrjá hjá Play. Félögin reikna sér á móti skattalega inneign sem nýtist þegar afkoman verður jákvæð.

Tapreksturinn hjá Play nemur nú 14 milljörðum króna síðustu 25 mánuði, frá ársbyrjun 2021 og fram til loka marsmánaðar. Sú upphæð er einum milljarði hærri en sem nemur öllu því hlutafé sem fjárfestar hafa lagt í rekstur flugfélagsins.

Hjá Icelandair var tapið á fyrsta fjórðungi meira en verið hefur um langt skeið ef Covid-árið 2020 er tekið út fyrir sviga. Þetta á bæði við um heildartapið og eins rekstrarafkomuna (Ebitda) eins og sjá má hér fyrir neðan en þar eru uppgjör Icelandair í bandaríkjadollar umreiknuð í krónur miðað við meðalgengi á hverju tímabili fyrir sig.

Lítill sem enginn lax

Það kom fram í máli tilkynningu Icelandair að þungur róður í fraktfluti sé ein af helstu skýringunum á verri afkomu. Spurður um nánari útskýringar á þessu þá segir Guðni Sigurðsson, talsmaður Icelandair, í svari til Túrista að ástandið hafi verið erfitt á fraktmörkuðum og minni eftirspurn um allan heim.  

„Eftirspurn eftir dýrari vörum eins og ferskum fiski frá Íslandi hefur dregist saman á lykilmörkuðum sem rekja má til veikari efnahags sem er afleiðing af stríðinu í Úkraínu.  Lítill sem enginn lax er framleiddur á Íslandi í dag vegna sýkingar í framleiðslu, en laxinn mun byrja aftur að fara á markaði um miðjan júlí.  Þá hefur flugáætlun okkar verið óregluleg, sem hefur haft áhrif á eftirspurn til skamms tíma,“ útskýrir Guðni.

Hann bætir því við að áfram sé stefnt að því að byggja upp miðstöð fyrir flugfrakt á milli Evrópu og Norður-Ameríku hér á Íslandi.

„Við höfum mikla trú á þeim tækifærum sem það mun skapa.  Vel hefur gengið að afla nýrra viðskiptavina sem nýta þjónustuna á Norður Atlantshafinu og við merkjum vaxandi áhuga á viðskiptum við Icelandair Cargo á N-Atlantshafinu. Í dag er flogið til frá Liege í Evrópu til New York og Chicago og svo í haust mun Los Angeles bætast við.“

Veðrið setti strik í reikninginn

Í janúar og febrúar þurfti Icelandair að aflýsa fimm af hverjum 100 ferðum á milli landa og 27 prósent af innanlandsfluginu. Þetta eru fleiri ferðir en félagið hefur áður þurft að fella niður og kom þetta niður á afkomunni.

Aftur á móti voru þotur Icelandair þéttsetnari á fyrsta ársfjórðungi en þær hafa áður verið á þessum árstíma því sætanýtingin var að jafnaði 78 prósent. Gera má ráð fyrir að fyrrnefndar aflýsingar hafi þar áhrif enda hefur þurft að sameina ferðir vegna veðurs. Einnig ber að hafa í huga að Icelandair nýtir nú í mun meira mæla minni þotur en áður. Í Boeing Max 8 þotunum eru til að mynda aðeins 160 sæti en þau eru 183 í gömlu Boeing 757 þotunum.

Áfram gert ráð fyrir hagnaði í ár

Þrátt fyrir þunga byrjun á árinu þá gera stjórnendur Icelandair ráð fyrir hagnaði í ár og vísa meðal annars til mun betri bókunarstöðu áður fyrir næstu 6 mánuði og lækkun eldsneytisverðs. Ef Icelandair verður réttum megin við núllið í ár verður það í fyrsta sinn frá árinu 2017 sem félagið skilar hagnaði.

Þess má geta að stjórn Icelandair tilkynnti sl. föstudag um nýja kaupréttarsamninga við fimmtíu stjórnendur hjá flugfélaginu. Skiptir hópurinn á milli sín nærri 400 milljónum hlutum en mest fær forstjórinn en í hans hlut koma 22 milljónir hluta. Markaðsvirði þeirra er í dag um 44 milljónir kr.

Nýtt efni

Árið 2023 varð metár í komum ferðamanna til hinnar fornu, fögru og söguríku Aþenu. Um sjö milljónir erlendra ferðamanna lentu á Aþenu-flugvelli sem kenndur er við Eleftherios Venizelos, 600 þúsundum fleiri en 2019. Bandaríkjamenn voru stærsti hópurinn, ein milljón, en næst á eftir komu 687 þúsund Bretar, 478 þúsund Þjóðverjar, 462 þúsund Frakkar og 410 …

Áætlun Ryanair á komandi sumarvertíð byggir á því að félagið fái að lágmarki 50 nýjar Boeing Max þotur en forstjóri flugfélagsins, Michael O'Leary, er svartsýnn á að það gangi eftir. Nýju þoturnar verði í besta falli fjörutíu en upphaflega hafði Boeing lofað 57 nýjum Max-þotum samkvæmt frétt Bloomberg. „Það hamlar vexti okkar að vita ekki …

Stellantis er einn stærsti bílaframleiðandi heims. Í viðtali við þýska blaðið Welt am Sonntag ítrekar Carlos Tavares, forstjóri Stellantis, stuðning samsteypunnar við banni við sölu á bílum knúnum bensíni og dísil árið 2035. Ummælin falla í tilefni af því að margir spá íhaldssveiflu í Evrópuþingskosningum í júní og að í framhaldi af því verði áformum …

Það vakti athygli að fáum dögum eftir lát eins af þekktari ritstjórum The New York Times, Joseph Lelyveld, streymdu inn á Amazon-netverslunina fjölmargar nýjar ævisögur ritstjórans. Lelyveld lést í janúar í ár og þegar bróðir hans Michael fór inn á netið fáum dögum eftir útför Josephs til að sjá hvernig samferðarmenn minntust bróðurins tók hann eftir …

Skotar hafa löngum verið hrifnir af hafragraut. Fornleifarannsókn á Suðureyjum á vegum Bristolháskóla árið 2022 leiddi í ljós að hafragrautur hefur verið hluti af mataræði þeirra árþúsundum saman. Á miðöldum einkenndist veðurfar í Skotlandi af miklum raka og skornum skammti af sólarljósi. Þar af leiðandi náðu aðeins harðgerðustu korntegundir að vaxa og upp frá því …

Árið 1952 kom út bók á Ítalíu sem bar þann fallega titil Allir okkar liðnu dagar. Í rauninni heitir bókin á ítalska frummálinu Tutti i nostri ieri, sem í beinni þýðingu væri: Allir okkar gærdagar. Bókin sem var skrifuð af ítalska rithöfundinum Natalia Ginzburg var meira eða minna gleymd af heiminum. Árið 2023 gekk bókin skyndilega og …

Amalfiströndin eða Costiera Amalfitana í Campania-héraði er talin meðal mest heillandi ferðamannaslóða Ítalíu. Ströndin snýr að Salernoflóa og Tyrrenahafi, litríkir bæirnir kúra undir bröttum hlíðum Sorrentine-skaga og hafa laðað til sín gesti víða að frá 18. öld, fyrst fína fólkið en síðan fjölbreyttari mannflóru. Yfirvöld vilja fá enn fleiri gesti og unnið er að því …

„Lítil umferð kemur sér vel. En ef bílum fjölgar mikið þá verður þetta verra því vegirnir eru ekki hannaðir fyrir bæði bíla og hjól,“ segir Tyler Wacker hjá fyrirtækinu „Cycling Westfjords“ á Ísafirði, sem bæði býður upp á þjónustu fyrir hjólreiðafólk og heldur úti „Arna Westfjords Way Challenge“, 960 kílómetra hjólreiðakeppni eftir Vestfjarðaleiðinni svokallaðri. „En …