Þegar kauphöllin í Ósló opnaði í byrjun vikunnar kostaði hver hlutur í flugfélaginu 10,6 norskra krónur en tveimur sólarhringum síðar er gengið komið upp í 12,1 og nemur hækkunin 14 prósentum. Skýringin á þessari miklu hækkun liggur í nýju verðmati sem tvö verðbréfafyrirtæki gáfu út á mánudagsmorgun.
Hjá því fyrra, frá DNB Markets, var matið á Norwegian fært upp í 18 krónur á hlut og það seinna, Pareto Securities, verðlagði bréfin ennþá hærra eða á 20 krónur. Hlutabréfin í Norwegian voru þá tvöfalt meira virði en þau kostuðu í kauphöllinni á mánudagsmorgun að mati fyrirtækjanna tveggja.
Greinendurnir vísuðu í nýtt uppgjör Norwegian máli sínu til stuðnings en á fimmtudaginn í síðustu viku gerði flugfélagið upp fyrsta fjórðung ársins. Þá lét forstjóri Norwegian reyndar þau orð falla að greinendur ættu kannski að endurskoða þágildandi verðmat á flugfélaginu og benti hann á lágt olíuverð, góða bókunarstöðu og há fargjöld.
Hér heima var þróunin allt önnur.
Á föstudag í síðustu viku birti greinendinn Jakobsson Capital nýtt verðmat fyrir Icelandair sem hljóðaði upp á 3,07 krónur á hlut sem var 60 prósent hærra verð en borga þurfti fyrir bréfin á markaði þann daginn. Gengi bréfa í Icelandair stóð hins vegar í stað á föstudaginn og hefur svo lækkað um 3 prósent í vikunni.
Í dag er þjóðhátíðardagur Norðmanna og kauphöllin í Ósló lokuð. Hér heima verður hægt að sýsla með bréf Icelandair og það kemur þá í ljós hvernig fjárfestar taka þeim tíðindum að tekið verði tillit til legu Íslands þegar breytingar á viðskiptakerfi með losunarheimildum verður breytt um áramótin. Ekki liggur þó fyrir hvernig þessi aðlögun verður framkvæmd nema að því leyti að Ísland fær losunarheimildir sem hægt verður að úthluta til flugfélaga árin 2025 og 2026.
Frá og með árinu 2027 er það markmið Evrópusambandsins að allar flugferðir frá Evrópu verði hluti af viðskiptakerfinu en í dag nær kerfið bara til evrópskra flugfélaga.
