Það seldust rúmlega 24 þúsund lítrar af áfengi í Áfengis- og tóbaksverslun ríkisins í fyrra samkvæmt nýrri ársskýrslu. Aðeins tvisvar sinnum áður hefur salan verið meiri í lítrum talið.
Það var árin 2020 og 2021 þegar sóttvarnaraðgerðir við landamæri gerðu ferðalög milli landa oft á tíðum erfið.
Sú staða endurspeglast í notkun íslenskra greiðslukorta í fríhöfnum landsins á þessum árum. Árið 2019 keyptu Íslendingar til að mynda tollfrjálsan varning fyrir um 8 milljarða króna en um leið og kórónuveirufaldurinn hófst hrundi salan og nam rétt um 2 milljörðum árið 2020. Árið eftir urðu utanlandsferðir ögn einfaldari og um leið jókst sala á tollfrjálsum varningi en nam þó aðeins um þremur milljörðum króna árið 2021.
Þessi þróun sést líka vel í ársreikningum Fríhafnarinnar því árið 2019 nam vörusalan þar um 13 milljörðum króna en fór niður rúma þrjá milljarða árið 2020 og nam fimm milljörðum 2021.
Landamæri opnuðust upp á gátt í byrjun síðasta árs og velta Fríhafnarinnar rauk upp í 12 milljarða í fyrra og þá voru íslensk greiðslukort nýtt til að borga fyrir 7,5 milljarða kr. af tollfrjálsum varningi. Þessar upphæðir eru litlu lægri en sem nemur kortaveltunni árið 2019 en þá er ekki tekið tillit til verðlagsþróunar.
Þó kaup á tollfrjálsum varningi í fyrra hafi verið í takt við árið 2019 þá var salan í ÁTVR, í lítrum talið, um sjö prósent meiri en allt árið 2019. Til viðbótar við áfengissölu ÁTVR og Fríhöfnarinnar þá hafa netverslanir með vín sótt í sig veðrið hér á landi frá því í heimsfaraldrinum.