Á fyrstu árum þessarar aldar var ekki flogið daglega milli Íslands og Parísar allt árið um kring. Þotur Icelandair flugu þá tvær ferðir í viku til Charles de Gaulle flugvallar yfir vetrarmánuðina. Vorið 2007 hóf Iceland Express áætlunarflug þangað og síðan þá hefur ríkt samkeppni um farþega á leið milli Parísar til Íslands, fyrst yfir sumarmánuðina og síðan allt árið um kring.
Stærsta flugfélag Frakka, Air France, hefur ekki blandað sér í slaginn en dótturfélag þess, Transavia, hefur boðið upp á Íslandsflug frá Orly flugvell, sunnan við París, um langt árabil og næsta vetur ætlar hið breska Easyjet að fljúga frá þeim flugvelli til Íslands í fyrsta sinn. Ferðirnar verða tvær ferðir í viku.
Þar með verður samkeppnin um farþega á leið milli Íslands og höfuðborgar Frakklands óvenju hörð en stór hluti þeirra sem nýtir sér flugferðir Icelandair og Play, til og frá Charles de Gaulle, eru tengifarþegar á leið alla leið til Norður-Ameríku.
Af flugfélögunum fjórum verður Icelandair umsvifamest næsta vetur með 11 brottfarir frá París í viku, þotur Play fljúga daglega, Transavia þrjár til fjórar ferðir í viku og Easyjet tvær. Þess ber þó að geta að Transavia hefur ekki birt dagskrá sína en félagið gerir það alla vegna með styttri fyrirvara en keppinautarnir.
Síðustu fjóra mánuði hafa 20 þúsund Frakkar flogið frá Keflavíkurflugvelli en þessi talning Ferðamálastofu er nýtt til að leggja mat á fjölda ferðamanna á landinu.
