Aðalfundur Samtaka ferðaþjónustunnar fór fram á Hilton Reykjavík Nordica í gær en í aðdraganda fundarins fór fram rafræn kosning meðal félagsmanna um þrjá meðstjórnendur í stjórn SAF til næstu tveggja ára ásamt því að kjörinn var formaður.
Á fundinum var Pétur Óskarsson, framkvæmdastjóri Viator ehf., sjálfkjörinn formaður SAF til næstu tveggja ára. Tekur Pétur við formennskunni af Bjarnheiði Hallsdóttur, framkvæmdastjóra Kötlu-DM, sem verið hefur formaður SAF frá árinu 2018. Pétur og Bjarnheiður eru samstarfsfólk, eiga og reka fyrirtækin Katla Travel GmbH, Viator Summerhouses GmbH og Katla DMI ehf.
Ragnhildur Ágústsdóttir, stofnandi og eigandi Lava Show, Erna Dís Ingólfsdóttir, framkvæmdastjóri hjá Íslandshótelum og Björn Ragnarsson, forstjóri Icelandia hlutu kjör í stjórn SAF til næstu tveggja ára. Ásamt þeim sitja í stjórninni þau Rannveig Grétarsdóttir, eigandi Eldingar og Akureyri Whale Watching, Helgi Már Björgvinsson, yfirmaður alþjóðasamskipta hjá Icelandair og Nadine Guðrún Yaghi, forstöðumaður samskipta og þjónustu hjá Play.