Forsvarsmenn helstu ferðaþjónustufyrirtækja landsins og ráðamenn þjóðarinnar voru samankomnir í Hörpu haustið 2013 til að hlýða á sérfræðinga ráðgjafafyrirtækisins Boston Consulting Group kynna tillögur sína um framtíðarskipulag íslenskrar ferðaþjónustu. Mæltu þeir með fjárfestingu í hinum margumræddu innviðum og umdeildari var tillaga þeirra að taka upp hinn svokallaða náttúrupassa. Stuttu síðar lagði þáverandi ráðherra ferðamála, Ragnheiður Elín Árnadóttir, fram umdeilt frumvarp um passann sem hún dró svo tilbaka nokkru síðar.
Á kynningunni í Hörpu birtu sérfræðingar Boston Consulting Group (BCG) einnig spá um sína yfir þann fjölda ferðafólks sem gæti verið væntanlegt til Íslands næsta áratugin. Var spáin tvískipt, annars vegar í þann fjölda sem kæmi ef ráðleggingum BCG væri fylgt en hins vegar hvað myndi gerast ef skipulag ferðamála yrði óbreytt. Var síðarnefnda spáin nokkru svartsýnni en sú fyrri eins og sjá má á grafinu hér fyrir neðan. Þar sést líka vel hversu hratt spá ráðgjafanna fór út af sporinu og hversu langt þeir voru frá rauntölunni á nýliðnu ári. Þá voru þeir um 2,2 milljónir en spá BCG gerði ráð fyrir að þá myndi fjöldi ferðafóolks í fyrsta sinn fara yfir eina milljón. Skekkjan var 105% og hún verður ennþá hærri í ár ef farþegaspá Isavia gengur eftir. Reyndar fór spá ráðgjafanna út af sporinu strax fyrsta árið jafnvel þó skýrslan hafi verið kynnt þá um haustið.
Það hefur þó ekki aðeins reynst hinu breska teymi frá Boston Consulting Group ómögulegt að spá fyrir um fjölda ferðamanna á Íslandi. Greiningardeildir íslensku bankanna hafa til að mynda ekki komist nærri rauntölunum jafnvel þó þær spár hafi verið fyrir mun styttra tímabil. Einnig verður að hafa í huga að í fyrra voru í fyrsta gerðar kannanir á hugsanlegu ofmati í ferðamannatalningunni á Keflavíkurflugvelli og gæti oftmatið á síðasta árið numið 250 þúsund ferðamönnum. Það þyðir að tíundi hver einstaklingur sem talin er sem ferðamaður er í raun útlendingur búsettur á Íslandi eða sjálftengifarþegi sem stoppar hér aðeins í örfáa klukkutíma eða yfir dagspart.
