Eftir að greiðsluskjóli ferðaþjónustufyrirtækisins Allrahanda Gray Line lauk síðastliðið sumar óskuðu forsvarsmenn fyrirtækisins eftir heimild til fjárhagslegrar endurskipulagningar með nauðasamningum. Þeirri leið hefur dómskerfið hafnað. Nú síðast með úrskurði Hæstaréttar í byrjun mars.
Nokkrir kröfuhafar settu sig einnig upp á móti nauðasamningunum og þar á meðal Landsbankinn, Isavia og N1. Í bréfi sem meirihlutaeigendur Allrahanda Gray Line, þeir Þórir Garðarsson og Sigurdór Sigurðsson, sendu kröfuhöfum sl. sumar segir að neikvæð afstaða Landsbankans til neyðarsamninganna hafi ekki komið á óvart. Enda hafi bankinn viljað að fyrirtækið seldi fasteign sína að Klettagörðum 4 sem fyrst.
Í bréfið skrifuðu þeir Þórir og Sigurdór jafnframt að N1 hafi viljað kaupa þessa sömu eign á „verulega niðursettu verði“ en því hafi verið hafnað.
Nú herma heimildir Túrista að Allrahanda GL hefur selt fasteign sína við Klettagarða til Festis, móðurfélags N1. Söluverðið mun vera töluvert hærra en kauptilboðin sem bárust í húsnæðið í upphafi Covid-19 faraldursins fyrir tveimur árum síðan.
Horfa áfram til nauðasamninga
Í síðustu viku fékk Allrahanda GL heimild til greiðslustöðvunnar og rennur hún út þann 26. apríl. Umsjónarmaður fyrirtækisins í því ferli sendi í gær lánadrottnum boð til fundar, lögum samkvæmt, þann 22. apríl. Á fundinum verður meðal annars gerði grein fyrir því hvernig fyrirtækið hyggst koma nýrri skipan á fjármál sín og hvort óskað verði áframhaldandi greiðslustöðvunar.
Í bréfi til lánadrottna segir jafnframt að ætlunin sé að leggja fram frumvarp að nauðasamningi í lok greiðslustöðvunartímabilsins. Afstöðu lánadrottna til fyrirhugaðra ráðagerða verður leitað á fundinum næsta föstudag.
