Heimsfaraldurinn hafði skiljanlega mjög neikvæð áhrif á rekstur hótela og þegar árið 2020 var gert upp hjá Keahótelunum nam rekstrartapið 822 milljónum króna. Í lok ársins varð móðurfélag hótelkeðjunnar gjaldþrota og Landsbankinn eignaðist 35 prósent hlut í þessu þriðja stærsta hótelfyrirtæki landsins. Gömlu eigendurnir héldu eftir 65 prósentum.
Afkoma fyrirtækisins batnaði verulega á síðasta ári því samkvæmt nýju uppgjöri samstæðunnar þá nam rekstrarhagnaðurinn 54 milljónum króna í fyrra. Tekjurnar nærri því þrefölduðust á árinu og fóru upp í 2,9 milljarða kr. Í heildina tekið var hagnaðurinn hjá Keahótelunum á síðasta ári 1,2 milljónir kr. í samanburði við 497 milljón króna tap árið 2020.
Í uppgjöri Keahótelanna kemur fram að gefin voru út tryggingabréf upp á 280 milljónir króna til tryggingar á skuldum við Landsbankann í fyrra. Ennfremur var leigusölum veitt bankaábyrgð til tryggingar á leigugreiðslum upp á 403 milljónir króna en fasteignafélögin Reitir, Reginn og Kaldalón eiga stóran hluta af þeim hótelbyggingum sem Keahótelin leigja. Síðastnefnda félagið keypti í fyrra tvær byggingar sem hótelkeðjan leigir en meðal seljenda voru hluthafar í Keahótelunum sem fengu í staðinn hlut í Kaldalóni.
Keahótelin tóku í fyrra lán upp á rúmlega hálfan milljarð króna. Sú lántaka er að hluta til með ríkisábyrgð í samræmi við þann stuðning sem Alþingi samþykkti að veita ferðaþjónustufyrirtækjum vegna tekjufalls sem rekja mátti til heimsfaraldursins.
Sem fyrr segir á Landsbankinn 35 prósent hlut í Keahótelunum og þar með er bankinn stærsti einstaki hluthafinn. Bankinn var líka helsti lánadrottinn gamla móðurfélagsins en lýstar kröfur í þrotabú þess námu 3,8 milljörðum króna en engar eignir fundust í búinu.
Bandaríska fjárfestingasjóðnum Pt Capital er næststærsti hluthafi Keahótelanna með 32,5 prósent hlut. Þetta er sami sjóður og seldi nýverið um 40 prósent í símafyrirtækinu Nova fyrir tæpa átta milljarða króna.
