Tekjur Icelandair af sölu farmiða voru mun hærri á þriðja fjórðungi ársins en dæmi eru um þrátt fyrir að farþegahópurinn hafi verið fámennari en á árunum fyrir heimsfaraldur. Að jafnaði hækkuðu tekjurnar af hverjum farþega um fimmtung í dollurum talið en mun meira ef upphæðirnar eru umreiknaðar í krónur. Dollarinn er nefnilega mun sterkari núna en þá var.
Bogi Nils Bogason, forstjóri Icelandair, segir það hins vegar nokkra einföldun að halda því fram að hærri farþegatekjur skrifist einfaldlega á hærri fargjöld líkt og Túristi gerði í grein sinni á föstudaginn.
„Við höfum breytt tekjustýringunni sem skilar sér í betri sætanýtingu en áður. Það á til að mynda við um Saga Premium þar sem miðarnir eru almennt dýrari og það skiptir máli. Aukningin þar skrifast ekki á viðskiptaferðalanga heldur frekar almenna farþega sem eru reiðubúnir til að borga fyrir meiri þjónustu og betri sæti,” bendir forstjóri Icelandair á.
Það má þó ljóst vera að fargjöld hafa verið há að undanförnu eins og uppgjör Icelandair og fleiri flugfélaga hafa sýnt fram á. Meðalfargjaldið í Evrópuflugi United Airlines var til að mynda 30 prósent hærra nú í sumar en í fyrra.
En er þetta verðlag sé komið til að vera?
„Já, almennt tel ég svo vera. Það hafa komið til miklar kostnaðarhækkanir, olíuverð er hátt, verð á aðföngum hefur hækkað og laun líka. Og það má gera ráð fyrir áframhaldandi þrýstingi á hækkanir á ýmsum kostnaðarliðum næstu misserin. Ég hef því enga trú á því að flugfélög fari að selja farmiða langt undir kostnaðarverði líkt og tíðkaðist á sínum tíma,” segir Bogi Nils og vísar þar til fargjalda Wow Air og Norwegian á flugi milli Evrópu og Norður-Ameríku á árum áður.
Sókn þessara tveggja lágfargjaldaflugfélaga á markaðinn setti pressu á verðlag á flugi yfir Norður-Atlantshafið á árunum 2014 til 2019. Undir lok þessa tímabils kom það endurtekið fram í máli stjórnenda Icelandair að fargjöldin endurspeglaðu ekki hækkandi rekstrarkostnað, til að mynda vegna hærra eldsneytisverðs.
Wow Air hvarf svo af sjónarsviðinu í mars 2019 og í dag einbeitir Norwegian sér að flugi innan Evrópu.
Icelandair hefur hins vegar fengið aðra keppinauta í staðinn. Play byggir að miklu leyti á grunni Wow Air og hið Norse Atlantic ætlar að fylla að hluta til það skarð sem Norwegian skildi eftir sig. Umsvif nýliðinna tveggja eru þó ennþá lítil, í það minnsta í samanburði við Wow og Norwegian.
Áform stjórnenda Play og Norse gera þó ráð fyrir miklum vexti á næstu árum. Og samkeppnin frá rótgrónum flugfélögum eins og United Airlines harðnar, það félag birti nýverið áætlun sína fyrir næsta sumar og þar vegur Evrópuflugið enn þyngra en áður.
Það skrifast ekki eingöngu á mikla eftirspurn heldur líka þá staðreynd að Asíumarkaðurinn á ennþá langt í land og sérstaklega Kína. Þar með nýta evrópsk og amerísk flugfélög breiðþotur sínar í meira mæli í flug yfir Atlantshafið.
