Samfélagsmiðlar

Söluferli á ferðaskrifstofum hafið

Arion banki er opinn fyrir viðræðum um sölu á ferðaskrifstofunum sjö sem bankinn tók nýverið yfir. Reksturinn skilaði þriggja milljarða tapi í fyrra.

Arion banki tók yfir hið norræna ferðaþjónustuveldi Andra Más Ingólfssonar í sumarbyrjun. Við breytinguna var rekstur íslensku ferðaskrifstofanna Heimsferða og Terra Nova færður úr dönsku móðurfélagi yfir í íslenskt fyrirtæki. Í heildina eru ferðaskrifstofurnar sjö talsins og það er yfirlýst markmið Arion banka að selja þær allar sem fyrst. Samkvæmt upplýsingum frá bankanum þá er söluferlið komið af stað.

„Við erum eðlilega snemma í ferlinu núna en getum sagt að bankinn sé á þessu stigi opinn fyrir möguleikum og umræðum á að selja starfsemina bæði í heilu lagi eða minni einingum,“ segir í svari frá Arion banka. Þar kemur jafnframt fram að mögulega verði frekari upplýsingar veittar um stöðuna þegar Arion birtir uppgjör sitt fyrir annan ársfjórðung í þarnæstu viku.

Þriggja milljarða króna tap var á rekstri danska móðurfélagsins í fyrra en í tilkynningu sem Arion banki birti, þegar tilkynnt var um yfirtökuna í byrjun júní, kom fram að rekstur íslensku ferðaskrifstofanna gengi vel. Ekki liggur þó fyrir hvort borist hafa tilboð í þær en Heimsferðir hafa lengi verið ein af þremur umsvifamestu ferðaskrifstofum landsins sem sérhæfa sig í sölu á utanlandsferðum fyrir Íslendinga. Terra Nova er aftur á móti stórtæk í skipulagningu á Íslandsferðum. Stærsta ferðaskrifstofan á því sviði, Iceland Travel, sem er í eigu Icelandair er líka til sölu þó söluferlið sé ekki formlega hafið.

Sameining á Terra Nova og Iceland Travel hefur verið nefnd sem álitlegur kostur í ljósi stöðunnar en samkvæmt viðmælendum Túrista er óvíst hvort Samkeppniseftirlitið myndi heimila þess háttar samruna. Á sama hátt er gæti eftirlitið komið í veg fyrir kaup annarra ferðaskrifstofa á Heimsferðum þar sem hún er ein af þremur stærstu ferðaskrifstofunum á sínu sviði. Hinar eru Ferðaskrifstofa Íslands, sem rekur m.a. Úrval-Útsýn, og hins vegar Vita sem er í eigu Icelandair Group. Vita hefur verið rekin sem hluti af Iceland Travel en nú stendur til að selja út úr Icelandair samsteypunni. Þó ber að hafa í huga að ferðaskrifstofur eru í mikilli samkeppni við áætlunarferðir flugfélaga.

Nýtt efni

Borgaryfirvöld í Lissabon hafa samþykkt að hækka gistináttagjald úr 2 í 4 evrur. Gjaldtaka nær ekki til tjaldstæða. Þá hefur komugjald á skipafarþega verið hækkað úr 1 í 2 evrur. Tillaga um að hækka það gjald í 4 evrur var felld.  Lusa-fréttastofan hefur eftir Carlos Moedas, borgarstjóra, að það sé „sanngjarnt fyrir borgina og íbúa …

MYND: ÓJ

Kínverskir ferðamenn hafa verið töluvert áberandi í Reykjavík og víðar um land í vor. Auðvitað er fólk af kínverskum uppruna búsett um allan heim og eitthvað af því fer í Íslandsferðir en þeim hefur snarfjölgað sem koma hingað alla leið frá Alþýðulýðveldinu Kína. Samkvæmt talningu Ferðamálastofu á Keflavíkurflugvelli komu hingað í marsmánuði 8.642 Kínverjar og …

Brasilíski flugframleiðandinn Embraer greinir frá góðum gangi í pöntunum og afhendingu véla á fyrstu mánuðum ársins. Mestur var fögnuðurinn í höfuðstöðvunum í São José dos Campos þegar American Airlines staðfesti kaup á 90 farþegaþotum af gerðinni E175, sem verða notaðar í innanlandsflugi og eru hluti af stórri endurnýjun flugflota félagsins. E175 eru meðaldrægar vélar, oftast …

Faxaflóahafnir héldu vorfund sinn fyrir helgi til að kynna fyrirtækjum í ferðaþjónustu skipulag sumarsins við móttöku skemmtiferðaskipa, sem tekur mið af því raski sem verður vegna byggingar farþegamiðstöðvar Faxaflóahafna. Þeim framkvæmdum á að ljúka að tveimur árum liðnum, eins og FF7 greindi nýverið frá. Fram kom á fundinum að gert er ráð fyrir rúmlega 308 …

Fréttaveitan Bloomberg sagði frá því á dögunum að mikil úlfúð ríkti í alþjóðlegu kolefnisvottunarsamtökunum Science Based Targets initiatives, eða SBTi.  Fyrirtæki um allar koppagrundir hafa lengi reitt sig á vottanir frá SBTi þegar þau hafa fullyrt að þau stefni að kolefnishlutleysi.  Yfirleitt er kannski lítil ástæða til þess að fólk kippi sér upp við slæman starfsanda og …

Þegar lent er á flugvelli á ESB-svæðinu bíður farþeganna ekki verslun með tollfrjálsan varning við töskubeltin. Þess háttar er aðeins í boði fyrir brottför. Í Evrópuríkjum utan ESB gefst hins vegar tækifæri til að kaupa ódýrara áfengi við komuna eins og við þekkjum frá Keflavíkurflugvelli. Þeir sem nýta tollinn sinn þar til að kaupa léttvín …

Þrjár þotur Loftleiða munu næstu misseri fljúga viðskiptavinum erlendra ferðaskrifstofa hringinn í kringum heiminn. Um borð eru sætin stærri og færri en í hefðbundnu áætlunarflugi enda kostar ferðalagið skildinginn. Hver farþegi borgar 25 milljónir fyrir ferðalag líkt og farið var yfir í fréttum Stöðvar 2.  Það er ekkert nýtt að Icelandair leigi þotu og áhöfn í …