Um langt árabil hefur Icelandair eyrnamerkt hluta af farmiðaverðinu sem gjald sem ganga á upp í kaup á eldsneyti á þotur félagsins. Í lok síðustu viku tilkynnti félagið ferðaskrifstofum að ætlunin væri að hækka þetta gjald umtalsvert nú um mánaðamótin.
Og nú er þessi boðaða hækkun komin inn í farmiðaverðið. Þar með nemur eldsneytisálagið 13.800 krónum ef flogið er héðan til Evrópu og heim aftur og 24.600 kr. ef ferðast er vestur um haf. Algengt er að gjaldið nemi því um þriðjungi af heildarfarmiðaverðinu þegar horft er til ferðalaga nú í vor.
Hjá Play er nýtilkomið eldsneytisálag reiknað út frá fluglengd en ekki því hvort flogið til evrópskra eða amerískra borga. Engu að síður er það miklu lægra en hjá keppinautnum. Þannig er gjaldið 2.569 krónur af heildarfarmiðaverðinu ef flogið er til Berlínar í byrjun maí en 3.859 kr. þegar farið er til Boston. Þessar upphæðir nema vanalega innan við tíund af algengu farmiðaverði nú í vor samkvæmt athugun Túrista.
Í samanburði við Icelandair er gjaldið hjá Play því mun lægra líkt og Birgir Jónsson, forstjóri þess síðarnefnda, ræddi hér á síðum Túrista fyrr í vikunni. Þar sagði hann að gjaldið hjá Icelandair hefði verið hátt fyrir hækkun en hann vissi ekki hverjar forsendurnar væru hjá keppinautnum.
„Fyrir okkur er þetta einfalt dæmi. Við teljum að þessar hækkanir tengdar stríðinu í Úkraínu muni auka kostnaðinn okkar um 10 milljónir bandaríkjadollara (um 1,3 milljarðar kr.) á þessu ári. Við munum fljúga með um eina milljón farþega á árinu og því er gjaldið reiknað miðað við það og aðrar slíkar forsendur nú í lok mars,“ útskýrði Birgir.
