Löngu áður en ferðaþjónustan á Íslandi fór að blómstra hóf Airberlin að fljúga hingað reglulega frá nokkrum borgum í Þýskalandi yfir sumarmánuðina. Síðar bættist við heilsársflug frá Berlín og Dusseldorf en nú er sögu flugfélagsins hér á landi að ljúka því í dag er ekki hægt að bóka far með félaginu frá Íslandi frá og með 28. október. Þessi niðurstaða kemur ekki á óvart enda fóru forsvarsmenn flugfélagsins fram á greiðslustöðvun í ágúst og síðan þá hefur framtíð þess verið óviss. Nú er komið á daginn að Lufthansa og easyJet munu taka yfir hluta af starfsemi Airberlin en annað leggst af, þar á meðal flugið til Íslands. Alla vega eins og staðan er núna því hvorki Lufthansa eða dótturfélag þess, Eurowings, hafa boðað Íslandsflug frá Berlín eða Dusseldorf í vetur. Það sama er upp á tengingnum hjá easyJet en breska lággjaldaflugfélagið er með starfsstöð á Schönefeld flugvelli í austurhluta Berlínar.
Hins vegar mun Icelandair hefja flug til Berlínar um næstu mánaðarmót en þau áform voru tilkynnt fljótlega eftir að forsvarsmenn Airberlin fóru fram á greiðslustöðvun. En líkt og Túristi greindi frá þá gætu tækifæri leynst í falli Airberlin fyrir íslensku félögin tvö, ekki bara þegar kemur að því að flytja fólk milli Berlínar og Íslands heldur einnig á markaðnum fyrir ferðir milli þýsku höfuðborgarinnar og N-Ameríku. En Airberlin starfrækti frá Berlín flugleiðir til 5 bandarískra borga sem allar eru hluti af leiðakerfi WOW air. En íslenska lággjaldaflugfélagið hefur flogið til Berlínar allt frá stofnum og aukist verulega síðustu ár.
