Samruni Ferðaskrifstofu Íslands og Heimsferða er skaðlegur samkeppni samkvæmt frummati Samkeppniseftirlitsins. Eftir að forráðamönnum ferðaskrifstofanna tveggja var kynnt þetta frummat afturkölluðu þeir beiðni um samruna sem Samkeppniseftirlitið hafði haft til skoðunar frá því í janúar. Ferðaskrifstofurnar hafa að undanförnu dregið töluvert úr framboði nú í haust og vetur.
Á sama tíma hafa systurfélögin Icelandair og Vita fjölgað ferðum til sólarlanda. Þannig ætlar Vita að bjóða upp á vetrarferðir til Alicante í fyrsta sinn en þotur Icelandair eru nýttar í flugið til spænsku borgarinnar. Stjórnendur Icelandair sjá auk þess tækifæri í bæta við ferðum til Tenerife og fljúga þangað allt að fjórum sinnum í viku. Vita nýtir þessar sömu áætlunarferðir til að flytja sína farþega í pakkaferðir til Tenerife.
Það eru því vísbendingar um að hlutdeild Icelandair og Vita á sólarlandamarkaðnum séu að aukast hratt þrátt fyrir að Play hafi nýverið bæst við.
Aðspurður segir Páll Gunnar Pálsson, forstjóri Samkeppniseftirlits, að umsvif Icelandair og Vita hafi verið til skoðunar í tengslum við fyrrnefndan samruna. Páll Gunnar vísar jafnframt til þess að bæði Samkeppniseftirlitið og dómstólar hafi á fyrri tíð metið fyrirtæki í Icelandair samstæðunni markaðsráðandi á tilteknum mörkuðum. Til að mynda í flugi á tilteknum flugleiðum og í flugþjónustu.
„Bann samkeppnislaga við misnotkun á markaðsráðandi stöðu kann því að setja fyrirtækjum í þeirri samstæðu skorður. Samkeppniseftirlitið hefur hins vegar enga afstöðu tekið til þessa.“
Auka líka framboð á skíðaferðum
Það eru þó ekki bara á markaðnum fyrir sólarlandaferðir sem umsvif Icelandair fyrirtækjanna eru að aukast. Þannig bætti flugfélagið sjálft við áætlunarferðum til Salzburg í Austurríki stuttu eftir að Play hóf sölu á ferðum þangað. Vetrarflug til Salzburg var fastur liður á vetrardagskrá Wow Air og var þar stílað inn á íslenskt skíðafólk. Til viðbótar flýgur Icelandair svo viðskiptavinum Vita í skíðaferðir til Ítalíu.
Taka við fleiri vildarpunktum en áður
Þórunn Reynisdóttir forstjóri Úrval-Útsýn, sem heyrir undir Ferðaskrifstofu Íslands, hefur áður gagnrýnt að Vita bjóði viðskiptavinum sínum að greiða hærra hlutfall fargjaldsins með vildarpunktum Icelandair en áður tíðkaðist. Vill Þórunn meina að með þessu sé Icelandair í raun að niðurgreiða ferðir Vita. Talsmaður Icelandair tekur ekki undir þetta sjónarmið og segir Icelandair tilbúið til að leyfa ótengdum ferðaskrifstofum að taka við vildarpunktum.
Tengsl Vita og Icelandair ná þó ekki aðeins til eignarhaldsins því forstjóri Icelandair Group, Bogi Nils Bogason, er stjórnarformaður Vita. Með honum í stjórninni eru tveir af framkvæmdastjórum samstæðunnar.
